الاحقاف آية ۱۳

بیشک وہ جنہوں نے کہا ہمارا رب اللہ ہے پھر ثابت قدم رہے نہ ان پر خوف نہ ان کو غم

بے شک جنہوں نے کہا کہ ہمارا رب الله ہے پھر اسی پر جمے رہے پس ان پر کوئی خوف نہیں اور نہ وہ غمگین ہوں گے

بیشک جن لوگوں نے کہا کہ ہمارا رب اللہ ہے پھر اس پر جمے رہے تو ان پر نہ کوئی خوف ہوگا نہ غمگین ہونگے۔

جن لوگوں نے کہا کہ ہمارا پروردگار خدا ہے پھر وہ (اس پر) قائم رہے تو ان کو نہ کچھ خوف ہوگا اور نہ وہ غمناک ہوں گے

بیشک جن لوگوں نے کہا کہ ہمارا رب اللہ ہے پھر اس پر جمے رہے تو ان پر نہ تو کوئی خوف ہوگا اور نہ غمگین ہوں گے

بےشک جن لوگوں نے کہا کہ ہمارا پروردگار اللہ ہے اور پھر اس (اقرار) پر ثابت و برقرار رہے تو انہیں کوئی خوف نہیں ہے اور نہ ہی وہ غمگین ہوں گے۔

بیشک جن لوگوں نے اللہ کو اپنا رب کہا اور اسی پر جمے رہے ان کے لئے نہ کوئی خوف ہے اور نہ وہ رنجیدہ ہونے والے ہیں

جن لوگوں نے کہا کہ ہمارا پروردگار خدا ہے پھر وہ (اس پر) قائم رہے تو ان کو نہ کچھ خوف ہوگا اور نہ ہی وہ غمناک ہونگے
ان الذین قالوا ربنا اللہ ثم استقاموا فلاخوف علیھم (آلایۃ) الذین قالوا (تا) استقاموا معطوف، معطوف علیہ سے مل کر ان کا اسم ہے اور فلا خوف علیھم الخ ان کی خبر ہے اسم موصول چونکہ متضمن بمعنی شرط ہے اس لئے فلا خوف الخ متمضن بمعنی جزاء ہے جس کی وجہ سے خبر پر فاء زائدہ داخل ہے ثم حرف عطف ترتیب رتبی کو بیان کرنے کے لئے ہے یعنی اول توحید کا اقرار و اعتضاد ضروری ہے اس لئے کہ توحید کے بغیر کوئی عمل معتبر و مقبول نہیں ہوتا قالوا ربنا اللہ کا مطلب ہے توحید کا اقرار کرنا اور ثم استقاموا کا مطلب ہے اس پر تامرگ قائم رہنا اور توحید کے مقتضیات پر مکمل طور پر عمل کرنا۔
استقامت علی التوحید کا مفہوم :
حضرت انس (رض) کی روایت ہے کہ آنحضرت (صلی اللہ علیہ وآلہ وسلم) نے فرمایا قد قالھا الناس ثم کفر اکثرھم فمن مات علیھا فھو ممن استقام بہت سے لوگوں نے اللہ کو اپنا رب کہا مگر ان سے اکثر کافر ہوگئے، ثابت قدم وہ شخص ہے جو مرتے دم تک اسی عقیدہ پر جما رہا (ابن جریر، نسائی) حضرت ابوبکر صدیق (رض) نے استقامت کی تشریح اس طرح فرمائی ہے لم شرکوا باللہ شیئاً لم یلتفتوا الی الہ غنیرہ اللہ کے ساتھ کس کو شریک نہ کیا اس کے سوا کسی دوسرے معبود کی طرف توجہ نہ کی۔ (ابن جریر)
حضرت عمر (رض) نے استقامت کی تشریح اس طرح فرمائی، حضرت عمر (رض) نے ایک روز منبر پر یہ آیت تلاوت فرمائی اور فرمایا خدا کی قسم استقامت اختیار کرنے والے وہ ہیں جو اللہ کی اطاعت پر مضبوطی کے ساتھ قائم رہے، لومڑی کی طرح ادھر سے ادھر اور ادھر سے ادھر دوڑتے نہ پھرے) ابن جریر) حضرت عثمان نے فرمایا ثابت قدم وہ شخص ہے جس نے اپنے عمل کو اللہ کے لئے خالص کرلیا۔ (کشاف) حضرت علی نے استقامت کی تشریح یہ فرمائی ہے، فرماتے ہیں، ثابت قدم وہ ہے جو اللہ کے عائد کردہ فرائض فرمانبرداری کے ساتھ ادا کرتا رہا۔ (کشاف)
آیت مذکورہ میں ایمان و استقامت پر یہ وعدہ کیا گیا ہے کہ ایسے لوگوں کو نہ آئندہ کسی تکلیف کا خوف ہوگا نہ ماضی کی تکلیف پر رنج و افسوس رہے گا، اس کے بعد کی آیت میں اس بےنظیر راحت کے دائمی اور غیر منقطع ہونے کی بشارت دی گئیے، اس کے بعد کی چار آیتوں میں انسان کو اپنے والدین کے ساتھ حسن سلوک کی تاکیدی ہدایت دی گئی ہے۔

یعنی وہ لوگ جو اپنے رب کا اقرار کرتے ہیں اس کی وحدانیت کی گواہی دیتے ہیں، اس کی اطاعت کا التزام کرتے ہیں، اس پر ہمیشہ قائم رہتے ہیں اور ﴿ا سْتَقَامُوا ﴾ عمر بھر استقامت سے کام لیتے ہیں ﴿ فَلَا خَوْفٌ عَلَيْهِمْ ﴾ تو آنے والے کسی شر سے ان کے لئے خوف نہیں ﴿ وَلَا هُمْ يَحْزَنُونَ ﴾ اور نہ انہیں اس چیز پر حزن و غم ہے جو وہ پیچھے چھوڑ آئے ہیں۔

yaqeenan jinn logon ney yeh keh diya hai kay : humara perwerdigar Allah hai phir woh uss per sabit qadam rahey , to unn per naa koi khof taari hoga , aur naa woh ghumgeen hon gay .