التکویر آية ۴

اور جب تھلکی (گابھن) اونٹنیاں چھوٹی پھریں

اور جب دس مہینے کی گابھن اونٹنیاں چھوڑ دی جائیں

اور جب دس ماہ کی حاملہ اونٹنیاں چھوڑ دی جائیں گی (١)

٤۔١ جب قیامت برپا ہوگی تو ایسا ہولناک منظر ہوگا کہ اگر کسی کے پاس اس قسم کی حاملہ اور قیمتی اونٹنی بھی ہوگی تو وہ ان کی پرواہ نہیں کرے گا اور چھوڑ دے گا۔

اور جب بیانے والی اونٹنیاں بےکار ہو جائیں گی

اور جب دس ماه کی حاملہ اونٹنیاں چھوڑ دی جائیں

اور جب حاملہ اونٹیاں آوارہ پھریں گی۔

جب عنقریب جننے والی اونٹنیاں معطل کردی جائیں گی

اور جب بیاہنے والی اونٹنیاں بیکار ہوجائیں گی
وذا العشار عطلت، عربوں کو کسی چیز کی سختی اور ہولناکی کا تصور دلانے کے لئے یہ بہترین طرز بیان تھا، اس زمانہ میں عرب کے نزدیک دس مہینے کی گابھن اونٹنی سے زیادہ قیمتی اور کوئی مال نہیں ہوتا تھا، ایسی اونٹنی کی بہت زیادہ حفاظت اور دیکھ بھال کی جاتی تھی، ایسی اونٹنی سے لوگوں کا غافل ہوجانا گویا یہ معنی رکھتا تھا کہ اس وقت کچھ ایسی سخت افتاد لوگوں پر پڑے گی کہ انہیں اپنے اس عزیز ترین مال کی حفاظت کا بھی ہوش نہ رہے گا۔

﴿وَاِذَا الْعِشَارُ عُطِّلَتْ﴾ ” اور جب دس ماہ کی حاملہ اونٹنیاں چھوڑ دی جائیں گی ۔“ یعنی جب لوگ اپنے بہترین اموال کو بے کار چھوڑ دیں گے جن کا وہ ہر وقت بہت اہتمام اور دھیان رکھا کرتے تھے ۔ پس ان پر ایسا وقت آئے گا جو ان کو ان اموال سے غافل کردے گا ۔ عشارا ایسی اونٹیوں کو کہا جاتا ہے جن کے پیچھے ان کے بچے ہوتے ہیں ، یہ عربوں کا بہترین مال تصور کیا جاتا ہے جو اس وقت ان کے پاس ہوتا تھا ۔

aur jab das maheenay ki gabahan oontniyon ko bhi beykaar chorr diya jaye ga ,