الضحیٰ آية ۴

اور بیشک پچھلی تمہارے لیے پہلی سے بہتر ہے

اور البتہ آخرت آپ کے لیے دنیا سے بہتر ہے

یقیناً تیرے لئے انجام آغاز سے بہتر ہوگا (١)

٤۔١ یا آخرت دنیا سے بہتر ہے، دونوں مفہوم معانی کے اعتبار سے صحیح ہیں۔

اور آخرت تمہارے لیے پہلی (حالت یعنی دنیا) سے کہیں بہتر ہے

یقیناً تیرے لئے انجام آغاز سے بہتر ہوگا

یقیناً آپ کے لئے انجام (اور بعد کا دور) آغاز (پہلے دور) سے بہتر ہے۔

اور آخرت تمہارے لئے دنیا سے کہیں زیادہ بہتر ہے

اور آخرت تمہارے لئے پہلی (حالت یعنی دنیا) سے کہیں بہتر ہے
ولاخرۃ خیر لک من الاولی بعض مفسرین نے آخرت اور اولیٰ سے دنیا و آخرت مراد لی ہے اور بعض دیگر مفسرین نے اولی سے ابتدائی دور اور آخرۃ سے بعد کا دور مراد لیا ہے، یہ خوشخبری اللہ تعالیٰ نے آنحضرت (صلی اللہ علیہ وآلہ وسلم) کو ایسی حالت میں دی تھی جب کہ چند مٹھی بھر افراد آپ (صلی اللہ علیہ وآلہ وسلم) کے ساتھ تھے، ساری قوم آپ (صلی اللہ علیہ وآلہ وسلم) کی مخالف تھی، بظاہر کامیابی کے آثار دور دور تک نظر نہیں آرہے تھے اسلام کی شمع مکہ میں ٹمٹما رہی تھی اور اسی کو بجھانے کے لئے چاروں طرف سے طوفان اٹھ رہے تھے اس وقت اللہ نے اپنے نبی (صلی اللہ علیہ وآلہ وسلم) سے فرمایا کہ ابتدائی دور کی مشکلات سے آپ (صلی اللہ علیہ وآلہ وسلم) کی عزت و شوکت اور آپ (صلی اللہ علیہ وآلہ وسلم) کی قدر و منزلت برابر بڑھتی چلی جائے گی اور آپ (صلی اللہ علیہ وآلہ وسلم) کا نفوذ واثر پھیلتا چلا جائے گا، پھر یہ وعدہ صرف دنیا ہی تک محدود نہیں ہے اس میں یہ وعدہھی شامل ہے کہ آخرت میں جو مرتبہ آپ (صلی اللہ علیہ وآلہ وسلم) کو ملے گا وہ اس مرتبہ سے بھی بدر جہا بڑھ کر ہوگا جو دنیا میں آپ (صلی اللہ علیہ وآلہ وسلم) کو حاصل ہوگا، طبرانی نے اوسط میں اور بیہقی نے دلائل میں ابن عباس (رض) کی روایت نقل کی ہے کہ حضور (صلی اللہ علیہ وآلہ وسلم) نے فرمایا میرے سامنے وہ تمام فتوحات پیش کی گئیں جو میرے بعد میری امت کو حاصل ہونے والی ہیں اس پر مجھے بڑی خوشی ہوئی، تب اللہ تعالیٰ نے یہ ارشاد نازل فرمایا کہ آخرت تمہارے لئے دنیا سے بہتر ہے۔

رہامستقبل میں آپ کا حال تو اللہ تعالیٰ نے فرمایا : ﴿وَلَلْاٰخِرَۃُ خَیْرٌ لَّکَ مِنَ الْاُوْلٰی﴾ یعنی آپ کے احوال میں سے ہر متاخر حال کو سابقہ احوال پر فضیلت حاصل ہے ، چنانچہ رسول اللہ صلی اللہ علیہ وسلم درجات عالیہ پر ترقی کرتے رہے ، اللہ تعالیٰ آپ کے دین کو تمکن عطا کرتارہا، آپ کے دشمنوں کے خلاف آپ کو فتح ونصرت سے بہرہ مند کرتا رہا اور آپ کے احوال کے درست کرتا رہا یہاں تک کہ آپ نے وفات پائی۔ آپ فضائل، اللہ تعالیٰ کی نعمتوں ، آنکھوں کی ٹھنڈک اور دل کے سرور کے ایسے حال پر پہنچ گئے جہاں اولین وآخرین نہیں پہنچ سکے۔ پھر اس کے بعد آخرت میں آپ کے حال سے متعلق اکرام وتکریم اور انواع واقسام کے انعامات کی تفصیلات کے بارے میں مت پوچھیے ، اس لیے فرمایا : ﴿وَلَسَوْفَ یُعْطِیْکَ رَبُّکَ فَتَرْضٰی﴾ ” اور وہ عنقریب آپ کو وہ کچھ عطا کرے گا کہ آپ خوش ہوجائیں گے ۔“ اور یہ ایک ایسا معاملہ ہے جس کی اس جامع عبارت کے بغیر تعبیر ممکن ہی نہیں۔

aur yaqeenan aagay aaney walay halaat tumharay liye pehlay halaat say behtar hain .