(நபியே!) அளவற்ற அருளாளன்தான்,

இந்தக் குர்ஆனை (உங்களுக்குக்) கற்றுக் கொடுத்தான்.

அவனே மனிதனைப் படைத்தான்.

அவனே மனிதனுக்குப் பேசவும் கற்பித்தான்.

சூரியனும் சந்திரனும் (அவைகளுக்கு இறைவன் ஏற்படுத்திய) கணக்கின்படியே (செல்கின்றன).

செடிகள், (கொடிகள்,) மரங்கள் (ஆகிய அனைத்தும் அல்லாஹ்வுக்கு வழிப்பட்டுச்) சிரம் பணிகின்றன.

அவனே வானத்தை உயர்த்தினான். மேலும் (உங்கள் வியாபாரத்திற்காக) தராசை அமைத்தான்.

ஆகவே, நீங்கள் நிறுவையில் (கூட்டியோ குறைத்தோ) வரம்பு மீறாதீர்கள்.

ஆகவே, நீங்கள் நீதமாக நிறுங்கள். எடையைக் குறைத்து விடாதீர்கள்.

படைப்புகள் வசித்திருக்க வசதியாகப் பூமியை அமைத்தான்.